Presidenti i SHBA Joe Biden ka bërë një vizitë të papritur në Ukrainë ditën e sotme. Vizita e tij në Ukrainë vjen në një kohë kur për pak ditë shënohen një vit nga fillimi i pushtimit rus .

Udhëtimi i Biden është për të treguar mbështetjen për Kievin që vjen në një moment kritik të konfliktit, ndërsa Rusia përgatitet për një ofensivë të re ndaj Ukrainës, transmeton CNN. 

Ndërkaq, më herë, Shtëpia e Bardhë bëri të ditur se presidenti amerikan Joe Biden pritet të zhvillojë një vizitë dy ditore në Poloni.

Biden do të mbërrijë në Varshavë të martën ku do të takohet me presidentin polak Andrzej Duda.

“Presidenti do të mbajë një fjalim përpara 1-vjetorit të pushtimit brutal dhe të paprovokuar të Ukrainës nga Rusia, duke trajtuar mënyrën se si Shtetet e Bashkuara kanë mbledhur botën për të mbështetur popullin e Ukrainës ndërsa ata mbrojnë lirinë dhe demokracinë e tyre, dhe se si ne do të vazhdojmë të qëndroni me popullin e Ukrainës për aq kohë sa duhet”, thuhet në deklaratë.

Një vit më parë, Biden paralajmëroi se vendosja e trupave ruse përgjatë kufijve të Ukrainës ishte paraardhësi i luftës.

Në atë kohë, edhe disa brenda qeverisë së tij vunë në dyshim aftësinë e ukrainasve për t’i bërë ballë një pushtimi, duke parashikuar rënien e afërt të kryeqytetit Kiev. Në vend të kësaj, luftëtarët ukrainas kanë mbajtur kryeqytetin dhe vazhdojnë t’i rezistojnë përpjekjeve ruse për të kontrolluar territorin, të ndihmuar nga një fluks masiv i armëve, municioneve dhe pajisjeve perëndimore.

Ndërkaq, lufta është kthyer në një konflikt të ashpër, gjë për të cilën zyrtarët amerikanë thonë se mund të zgjasë me muaj apo edhe vite.

/rtsh.al/