Ministrja e Arsimit dhe Sportit, Evis Kushi përmes një postimi në rrjete sociale bëri të ditur datat e regjistrimit në klasa të para dhe të dhjeta, për të gjithë ata që nuk kanë arritur ta bëjnë gjatë fazës së parë përmes sistemit e-Albania. nga 21 gushti e deri më 1 shtator do të ketë një mundësi tjetër për regjistrimin e fëmijëve në klasat e para dhe të dhjeta. Gjithashtu ministrja e arsimit dhe sportit bën të ditur se do të kenë mundësi të regjistrohen në klasë të parë edhe ata fëmijë që ende nuk e kanë mbushur moshën 6 vjeç, por që e arrijnë këtë moshë deri më 31 dhjetor të këtij viti.

“Me ndryshimet që miratuam në Ligjin për Arsimin Parauniversitar, edhe vogëlushët që mbushin 6 vjeç deri në datën 31 dhjetor do të kenë mundësi të regjistrohen në klasë të parë për vitin e ri shkollor 2023 – 2024. Të gjithë prindërit që mendojnë se fëmijët e tyre, edhe pse ende nuk i kanë mbushur 6 vjeç e kanë tashmë zhvillimin dhe përgatitjen e duhur, si dhe kanë dëshirë t’i regjistrojnë ata në klasë të parë, janë të ftuar të aplikojnë në sistemin e-Albania nga data 21 gusht deri më 1 shtator. Ky afat vlen edhe për të gjithë ata prindër që nuk kanë arritur dot të bëjnë gjatë fazës së parë regjistrimet për fëmijët e tyre në klasën e parë dhe të dhjetë”, shprehet ministrja Kushi në postimin e saj në rrjetet sociale.