Kryetari i Bashkisë Pogradec Ilir Xhakolli ka bërë një inspektim të shkurtër në shkollën 9 vjecare të Linit e cila prej disa javësh ka nisur ti nënshtrohet një rikonstruksioni total falë bashkëfinancimit të Ministrisë së Arsimit dhe Sporteve dhe Bashkisë Pogradec. Xhakolli pa nga afër punimet të cilat po ecin me ritmet e duhura dhe krahas rikonstruksionit të godinës ekzistuese, do të ketë edhe dy shtesa për një palestër të re dhe një shtesë në godinën kryesore. Krahas ambjenteve të brendshme e të jashtëme, sistemit elektrik, hidraulik, dyer, dritare dhe sistemit qëndror të ngrohjes me kaldajë edhe oborri i shkollës do të transformohet totalisht dhe në shërbim të nxënësve. Në shkollën 9-vjecare të Linit mësojnë nxënës të fshatrave Lin, Buqezë dhe Piskupat deri në përfundimin e punimeve në këtë shkollë këta nxënës janë zhvendosur një një tjetër hapsirë e marrë me qira nga bashkia. Në fund të punimeve Lini do të ketë një shkollë me ambiente bashkëkohore dhe standardet e duhura për të gjithë nxënësit, një investim i nevojshëm dhe i kërkuar ndër vite që tashmë ka marrë jetë.