Regjistrimi i fëmijëve në klasë të parë për vitin e ri shkollor ka nisur me 15 qershor dhe do të mbyllet në fund të muajit.
Ashtu si një vit më parë edhe këtë vit aplikimi do të zhvillohet online nëpërmjet portalit E-Albania.
Prindërit nuk kanë humbur kohë dhe kanë nisur aplikimet. Si vitin e kaluar edhe këtë vit atyre nuk u lejohet të ndërhyjnë për të zgjedhur shkollën apo mësuesin e preferuar, por janë të detyruar të regjistrojnë fëmijën në institucionin shkollor që u nxjerr sistemi.
Drejtoresha e shkollës ”Maji“ Entela Gjondedaj sqaron se pasi përfundon aplikimi, emri i fëmijës shfaqet në sistem sëbashku me adresën e tij dhe vetëm nëse plotësohet kriteri i vendbanimit, kërkesa e prindit pranohet nga institucioni shkollor.
Prindërit do të kenë mundësi të regjistrojnë fëmijët për klasë të parë deri me 30 qershor. Pas përfundimit të kësaj faze të parë regjistrimesh, Drejtoria Arsimore do të vendosë nëse do t‘i rihapë regjistrimet në një fazë të dytë në muajin shtator.
