Edhe 654 shkolla të tjera në vend do të pajisen me laboratorë informatike, nga 216 të tillë që janë gati këtë vit shkollor. Lajmi është bërë i ditur nga ministrja e Arsimit dhe Sportit Ogerta Manastirliu gjatë vizitës në një prej shkollave të Tiranës, ku e ka shoqëruar edhe kryeministri Rama. Ky investim është një hap i rëndësishëm në zgjerimin e programit të kodimit dhe integrimin e Teknologjisë së Informacionit dhe Komunikimit (TIK) në kurrikulën e re shkollore për 35 mijë nxënës të arsimit fillor. Ky investim në infrastrukturën digjitale sipas Ministres Manastirliu është një hap i rëndësishëm drejt përmirësimit të cilësisë së arsimit që ecën dhe zhvillohet paralelisht me trajnimin dhe kualifikimin e mësuesve në aftësi digjitale.
Sipas ministres këtë muaj do të nisë edhe trajnimi i 400 mësuesve të arsimit fillor, ndërsa Programi Kombëtar i Zhvillimit Profesional të Mësuesve synon të trajnojë rreth 16 mijë mësues për metodat më efektive të mësimdhënies. Investimet në infrastrukturën digjitale dhe trajnimin e mësuesve janë të rëndësishme për të përgatitur nxënësit për sfidat e shekullit XXI.
