Skënderbeu dhe Dinamo ndahen në barazim 1-1 në testin miqësor të luajtur në Korçë ditën e diel. Një barazim që duket se më shumë nga ajo çka ekipet prodhuan në fushën e lojës i le shijë më të mirë bardhekuqve, që kanë dominuar gjithçka pavarësisht se mundën të barazonin vetëm në fundin e takimit. Pjesa e parë nis me një Dinamo më kërkuese në minutat e para që merr komandën e lojës dhe kërkon të fitojë terren. Por Skënderbeu zgjohet shpejt dhe rifiton mesin e fushës. Në momentin kur korçarët morrën kontrollin e lojës vjen goli i bluve të kryeqytetit. Denison pas një aksioni të bukur të Dinamos, gjendet i lirë në hyrje të zonës dhe arrin të shënojë duke kaluar të tijët në avantazh. Pas golit të pësuar korçarët mundohen të reagojnë dhe shtojnë mësymjet drejt portës së Salit që reziston në disa tentativa radhazi. Fillimisht është Lika që rrezikon portën e dinamos ndërsa më pas po me Likën korçarët kërkojnë një penallti për prekje të topit me dorë. Ndërsa Skënderbeu shton presionin në zonën dinamovite, blutë nuk shohin dot aspak nga porta e Alias që është spectator për pjesën e mbetur të takimit. Liço i frymëzuar dhe me rolin e liderit bën gjithçka mirë madje edhe flirton me golin por një super Sali e ndal, ndërsa Shaqe ka rastin më të mirë të shënojë por me kokë mbi vijën fatale e çon topin jashtë pas pasimit të Nikajt. Kur takimi po shkonte drejt fundit, Prençi barazon shifrat. Një harkim i Liços në zonë gjen saktë kokën e mbrojtësit që çon topin në rrjetë. Mbyllet kështu testi miqësor, i treti për Skënderbeun në shifrat 1-1, test i cili ka lënë të kënaqur trajnerin bardhekuq.