Ringrihet kompleksi i vajzave të shkollës së mesme artistike “Tefta Tashko Koço” në qytetin e Korçës, si një bërthamë e korit të ardhshëm. Nën drejtimin e mësueseve të kantos Zhuljeta Sheremeni dhe shoqërueses në piano Marjanthi Vrame, vajzat e kompleksit i gjetëm sot teksa bënin prova për shfaqjen që do të mbahet së shpejti në teatrin e Korçës, kushtuar familjes Jorganxhi.

Ish mësuesi i kësaj shkolle, Kostika Tanto, i cili është duke i shoqëruar vajzat në violonçelë, tregon se rikthimi i këtij kompleksi është vlerë për qytetin.

Kompleksi dhe kori i shkollës së muzikës, do të jetë një aset me shumë vlera jo vetëm për shkollën por edhe për qytetin e Korçës, duke patur si synim që të bëjë pjesë të tij zërat më të mirë edhe në bashkëpunim me shkolla të tjera.