Siç është bërë tashmë traditë, shkolla teknike profesionale “Demir Progri” në Korçë, ka organizuar “Ditën e hapur”. Ky aktivitet ka për qëllim të njohë nxënësit e klasave të 9-ta me drejtimet dhe profilet që ofron shkolla, certifikatat e kualifikimit që marrin në përfundim të çdo niveli, akomodimin në konvikt, bursat dhe rimbursimet e teksteve shkollore, stafin pedagogjik, bashkëpunimin me bizneset për realizimin e praktikave profesionale si dhe mundësitë e punësimit. Të pranishëm kanë qënë nxënës të klasave të 9-ta nga shkolla të ndryshme të cilët kanë vizituar muzeun e shkollës si dhe repartet e praktikës profesionale.

Nxënësit e shkollës teknike profesionale “Demir Progri”, na tregojnë arsyet pse kanë zgjedhur të studiojnë këtu, ku përveç pasionit, më kryesorja është mundësia e punësimit.

Interesi i nxënësve të shkollave 9-vjeçare të cilët kanë vizituar sot ambientet e shkollës ka qënë i lartë. Ata vlerësojnë këtë shkollë profesionale, pasi sipas tyre është një mundësi e mirë për të fituar një profesion në të ardhmen.

Shkolla teknike profesionale “Demir Progri” në Korçë ofron tre drejtime studimi mekanikë, shërbime mjetesh transporti dhe elektroteknikë. Ky aktivitet është një mundësi e mirë që nxënësit e klasave të 9-ta të njihen nga afër me kushtet që ofron shkolla, me stafin pedagogjik, laboratorët dhe repartet e praktikës profesionale, por mbi të gjitha me profesionet të cilat do t’i orientojnë ata drejt tregut të punës.