Piktorja e njohur korçare Krisanthi Koçibelli Turtulli ka ndërruar jetë në moshën 80-vjeçare. Mësohet se piktorja vuante nga një sëmundje e rëndë ndërsa lajmin e hidhur e kanë ndarë familjarët e saj. Gjithë jetën e saj ia kushtoi pikturës teksa rreth 3 muaj më parë, në tetor të vitit 2023, Krisanthi Kocibelli erdhi shumë afër publikut artëdashës korçar me një ekspozitë të veçantë, si një kujtim nga familjarët me punimet e realizuara ndër vite nga 80 vjeçarja. Krisanthi Koçibelli, vinte nga një prej familjeve më të njohura të Korçës, ajo Turtulli, që ka lënë gjurmë jo vetëm me bamirësitë e rralla por edhe shpirtin artistik të disa pasardhësve.

Krisanthi Koçibelli nisi të merrej me pikturë që në moshë të vogël, madje ka qënë piktorja e vetme korçare në liceun artistik në ato vite. Pas mbarimit të shkollës për shumë vite ka punuar si modeliste e me pas përgjegjëse në ndërmarrjen artistike në Korçë. Është autore e dy ekspozitave, teksa në koleksionin e saj numërohen më tepër se 250 piktura.