Struga Trim Lum nën drejtimin e Shpëtim Duros është duke arritur rezultate historike në Kupat e Europës, teksa së fundmi ka arritur të sigurojë kualifikimin në turin e tretë të Conference League. Liqenorët eliminuan Buduçnostin dhe në këtë tur të tretë do të përballen me ekipin e Hesperanxh nga Luksemburgu, ku gjithashtu do synojnë një tjetër rezultat historik: kalimin në “Play-Off”. Padyshim që një meritë të madhe ka trajneri Shpëtim Duro, i cili ka ndryshuar mentalitetin e ekipit dhe po i udhëheq drejt sukseseve të vazhdueshme. Në një lidhje telefonike me RTSH Korçën Shpëtim Duro ka folur për këtë arritje të Strugës, ndërsa u ndal edhe te kundërshtari i radhës, duke deklaruar se do tentojnë sërish të bëjnë suprizën. Në fund Duro foli edhe për merkaton, ndërsa e mbylli edhe me një përshëndetje për gjithë tifozët e Skënderbeut, pasi ruan kujtime të bukura me bardhekuqtë ku u shpall kampion i Kategorisë Superiore në edicionin 2010-2011.