I gjithë dokumentacioni dhe datat për regjistrimin në konkurs janë bërë publike nga ana e autoriteteve të Universitetit Fan Noli të Korçës. Sipas tyre të gjithë të interesuarit duhet të regjistrohen paraprakisht pranë sekretarisë mësimore në rektorat, nga data 12 deri në 16 gusht prej orës 9.00 deri në 14.00, ku duhet të dorëzojnë edhe disa dokumente. Aplikantët fitues të programit të studimit edukim fizik dhe sporte, në mmentin e regjistrimit për në konkurs duhet të kenë me vete një dokument identifikimi, raportin mjeko ligjor të nënshkruar dhe të vulosur nga komisioni mjeko ligjor, mandatpagesën e tarifës së konkurimit si dhe dy fotografi personale të përmasave 4×6 cm. Në konkursin i cili do të zhvillohet në ambjentet e Qytezës së Fëmijëve, në datën 20 gusht, të gjithë kandidatët do të kryejnë dy teste praktike që janë kërcim së gjati nga vendi dhe cirkuit. Më pas komisioni do të vlerësojë rezultatet e të gjithë kandidatëve duke renditur edhe ata fitues sipas kuotave që përcaktohen nga Ministria e Arsimit dhe Sportit për këtë program studimi.