Inspektoriati ndërtimor pranë bashkisë Pogradec, ka nisur prishjet e urave, shtesave dhe shkallëve prej betoni të cilat kishin bllokuar plazhin për qytetarët duke mos lejuar aksesin për këta të fundit. Ky lirim hapësirash publike vjen pak para nisjes së sezonit turistik dhe nga ana e bashkisë thuhet se qëllimi është që kjo zonë të lidhet dhe të jetë një e tëra bashkë me plazhin e “Uçkave” si një hapësirë publike plazhi dedikuar tërësisht qytetarëve.

Aksioni i prishjeve i nisur një ditë më parë është ndërprerë për të vijuar edhe ditën e martë, pasi duhet të bëhen disa ndërhyrje të vogla nga inxhinerët e Ujësjellës Kanalizime në një stacion pompash në këtë zonë.

Nga ana e banorëve nuk ka pasur rezistencë për prishjet, pasi ata ishin njoftuar edhe më herër për prishje vullnetare. Ajo që vihet re edhe në pamje është se sasia e betonit dhe gurëve të përdorur gjatë kohës së ndërtimeve ka qënë mjaft e madhe dhe me këto ndërhyrje qytetarët e Pogradecit por edhe vizitorët e shumtë të cilët do të zgjedhin të pushojnë në Pogradec këtë verë do të kenë më tepër hapësirë.