• Sport

Përforcimi i radhës për Skënderbeun/ Bardhekuqtë afrojnë një mesfushor nga Nigeria

Skënderbeu është në kulmin e merkatos dhe së fundmi skuadra korçare ka bërë goditjen e radhës duke afruar një mesfushor, i cili do plotësojë më shumë këtë repart. Bëhet fjalë për nigerianin 23- vjeçar Mario Rabiu, i cili ka gjetur akordin me drejtuesit e merkatos bardhekuqe dhe mund të quhet zyrtarisht një futbollist i Skënderbeut për sezonin e ardhshëm.

Me një karrierë të nisur në Nigeri, Rabiu ka kaluar më pas në futbollin italian, ku ka ndryshuar katër ekipe mes Serisë C dhe B. Fillimisht ai është bërë pjesë e Modenës, për të kaluar më pas te Groseto, e së fundmi te Viterbese në Serinë C italiane. Prej sezonit të ardhshëm ai do të veshë ngjyrat bardhekuqe, duke debutuar kështu në kampionatin shqiptar.

Me Mario Rabiun, Skënderbeu kompleton mesin e fushës, teksa për momentin pritet të shihet edhe situata e lojtarëve që kanë qenë pjesë e korçarëve në sezonin e kaluar dhe që u ka skaduar kontrata. Gjithsesi, një pjesë e mirë e boshtit të ekipit të Skënderbeut për vitin e ardhshëm duket se është ndërtuar tashmë.

Korçarët po kërkojnë me ngulm një sulmues, që do të jetë pikë e referimit për sezonin e ri. Pas dilemës së Temitope, i cili pavarësisht se zhvilloi një sezon të mirë me bardhekuqtë, duket gjithnjë e më pranë largimit nga Korça bardhekuqtë janë duke kërkuar alternativa të tjera në këtë repart dhe pritet që në ditët në vijim të ketë zhvillime të reja.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *