Ka rinisur procesi mësimor në gjimnazin Themistokli Gërmenji, i cili prej gati një viti i ishte nënshtruar rikonstruksionit të plotë të ambjenteve. Me një financim prej rreth 750 milionë lekë nga buxheti i shtetit gjimnazi është rikonstruktuar plotësisht ndërsa është ndërtuar edhe një palestër e re e mbyllur me standarde bashkëkohore e cila do të zëvendësojë palestrën e mëparshme e cila nuk kishte kushtet e duhura për zhvillimin e orëve të edukimit fizik. Në ambjentet e brendshme të këtij gjimnazi është kryer rikonstruksioni i plotë i suvave, janë vendosur dyer e dritare të reja, jshtë shtruar me pllaka të gjitha klasat e korridoret, janë rikonstruktuar totalisht tualetet e shkollës si dhe është kryer termoizolimi dhe hidroizolimi i të gjitha hapësirave. Gjithashtu janë kryer instalimet elektrike, hidraulike, janë shtrirë linjat e internetit si dhe instalimet për ngrohjen qëndrore me kaldajë. Në ambjentet e brendshme të shkollës palestra e vjetër është kthyer në një sallë konferencash në formë amfiteatri, ndërsa është punuar edhe në ambjentet e jashtme ku janë ndërtuar fushat e volejbollit, basketbollit si dhe një amfiteatër i ri që do të shërbejë për organizime e aktivitete të ndryshme shkollore. Ende ka disa ambjente në të cilat investimi nuk është përfunduar plotësisht siç është palestra e re, por pavarësisht kësaj rreth 530 nxënësit e këtij gjimnazi kanë nisur mësimin në ambjentet e reja me standarde bashkëkohore.