Ndahet nga jeta pas një sëmundje të rëndë ish kryeinxhinieri i RTSH Korçës, Gjergji Lera. Një lajm i hidhur për familjen dhe dy fëmijët e tij, për miqtë, shokët e kolektivin e radios dhe televizionit të Korçës, ku ai punoi me përkushtim thuajse për katër dekada. Një inxhinier i talentuar, i cili përfundoi shkëlqyer studimet në Universitetin e Tiranës. Sëbashku me kolegët e tjerë modernizuan Radio Korçën, një nga radiot më të hershme, me sinjalin e saj brenda dhe jashtë vendit, duke e kthyer me zërin dhe programet e saj në një radio të dashur për popullin.                                                                 Gjergji Lera ka dhënë një kontribut të çmuar edhe për televizionin Korça duke përhapur sinjalin e transmetimit në çdo cep të qarkut por edhe më gjerë. Modest e fjalëpak kolegu ynë dinte ku gjendej çdo gjë në sistemin e radios e televizionit, për të mos patur as edhe një sekondë ndërprerje sinjali, në cilësinë e figurës etj, duke kërkuar më shumë se te të tjerët, zgjidhje te vetja.            

Qofsh i pa harruar miku e kolegu ynë Gjergji Lera! Tashmë imazhin tënd do ta kemi të pashlyer nga kujtesa bashkë me valët e transmetimit të radios e televizionit, ashtu të ngrohtë e të përzemërt, siç edhe ti na deshe dhe na mbështesje me gjithë zemër në punë e në jetë. Lamtumirë!