Ditët e para të vitit janë shoqëruar edhe me virozat e stinës të cilat janë të përhapura në popullatë. Vetëm në urgjencën e Spitalit Rajonal të Korçës çdo ditë kryhen më shumë se 80 vizita, ndërsa edhe shumë qytetarë të tjerë i drejtohen qendrave shëndetësore, apo marrin mjekime në banesat e tyre. Mjekët thonë se nuk bëhet fjalë për covid-19, pasi testet e shpejta të kryera te pacientët kanë dalë negative.

Shumica e rasteve shkojnë deri në 7 ditë me simptoma të virozave, ndërsa është vërejtur edhe një kollë e thatë te shumica e pacientëve. Sipas mjekëve shumica e rasteve nuk paraqesin situata serioze të rrezikshme, por kalojnë me mjekime ambulatore në banesat e tyre.

Më e vështirë është situata për pacientët kronikë, të cilët duhet të bëjnë kujdes nga virozat, të përdorin maskat dhe të evitojnë grumbullimet.