Pas zgjidhjes së një prej problematikave kryesore të fshatit Vërnik në bashkinë Devoll që ishte rehabilitimi i rrugës lidhëse me qytetin e Bilishtit i cili është kryer si një bashkëfinancim me Qeverinë Bullgare, banorët ngrejnë shqetësimin e mungesës së kanalizimeve të ujrave të zeza dhe ujit të pijshëm. Ata shprehen pozitivisht për punën e kryer në asfaltimin e rrugës prej 5 km, një rrugë tepër problematike por kërkojnë që edhe këto shqetësime të marrin zgjidhje sa më shpejt. Momentalisht ujin e pijshëm banorët e sigurojnë përmes 2 çezmave publike që ndodhen në këtë fshat ndërsa sa i takon kanalizimeve, zgjidhja e vetme deri më tani ka qenë hapja e gropave septike.
Në lidhje me këto shqetësime të ngritura nga banorët, i kontaktuar nga RTSH Korça, kryetari i bashkisë Devoll Eduard Duro shprehet se kanë gati projektin e kanalizimeve dhe puna për ngritjen e rrjetit do të nisë së shpejti ndërsa në vëmendjen e tyre do të jetë edhe sigurimi i ujit të pijshëm nëpër banesa. Një ndër investimet më madhore të kësaj bashkie sa i takon ujit të pijshëm ka qenë ndërtimi i ujësjellësit rajonal të Mirasit që shërbeu për furnizimin me ujë 24 orë të fshatrave Sul, Koshnicë, Menkulas, Braçanj, Ponçarë, Fitore, Dobranj, Ziçisht, dhe Gjyrëz, ndërsa vitin e kaluar është ndërtuar dhe një tjetër rrjet ujësjellësi për të furnizuar me ujë fshatrat Miras, Vidohovë, Çetë, Sinicë dhe Arrëz.